Mədəniyyət

Beynəlxalq Muğam Mərkəzində Seyid Şuşinskinin 130 illik yubileyi qeyd olunacaq

  • 27 May 2019
  • 512 baxış

Mayın 29-da saat 19:00-da Beynəlxalq Muğam Mərkəzi “Unudulmayanlar” layihəsi çərçivəsində  Seyid Şuşinskinin anadan olmasının 130 illiyinə həsr edilmiş tədbir keçirəcək.

Tədbir Azərbaycan Respublikası Prezidentinin görkəmli xanəndənin 130 illik yubileyinin keçirilməsi ilə bağlı 4 fevral 2019-cu il tarixli Sərəncamının icrası ilə əlaqədar təşkil olunur. Mədəniyyət Nazirliyi və İctimai Televiziyanın dəstəyi ilə reallaşacaq yubiley gecəsində Seyid Şuşinskinin bənzərsiz sənət dünyasından söz açılacaq, muğam ustadları sənətkarla bağlı xatirələrini bölüşəcəklər. Tədbirdə həmçinin tanınmış xanəndələrin ifasında muğam dəstgahları səsləndiriləcək.

Qarabağ xanəndəlik məktəbinə mənsub qüdrətli sənətkar Seyid Şuşinski xalqımızın mənəvi dünyasının formalaşmasında müstəsna əhəmiyyət daşıyan qədim muğam ənənələrimizi layiqincə qoruyub yaşadıb. Geniş diapazonlu, nadir, ecazkar səsə və yüksək səhnə mədəniyyətinə malik böyük muğam ustası təkrarolunmaz mükəmməl ifaçılıq nümunələri ilə Azərbaycanın musiqi xəzinəsini daha da zənginləşdirib. Seyid Şuşinski müəllim kimi uzun illər ərzində istedadlı musiqiçilərin yetişdirilməsi sahəsində də təqdirəlayiq fəaliyyət göstərib.

Seyid Şuşinski ifa üçün mürəkkəb muğam olan “Cahangah”ı xüsusilə böyük məharətlə oxuyub, özü də həmişə onu “mayə”dən deyil, “Mənsuriyyə”dən başlayıb. Məhz bu ustalıqlarına görə Azərbaycan muğam tarixinin əfsanələrindən olan Cabbar Qaryağdıoğlu onu “Şərq musiqisinin incisi” adlandırıb.                                                                                                                                                                                                                                                                                              Xalq TV                                                                                                                                                                                                                                                                                                                                                                                                                                                                                                         Aygün Məmmədova                                    

RƏYLƏR
ÖNƏRİLƏN XƏBƏRLƏR