idman

Yığmamız dünya boksunun 6 nəhəngi sırasında

30 Aug 2017
268 baxış

Almaniyanın Hamburq şəhərində keçirilən boks üzrə dünya çempionatının 1/4 final mərhələsinin başa çatması ilə medal qazanacaq ölkələrin adlarına aydınlıq gəlib.

XalqTV.com apasport.az-a istinadən xəbər verir ki, yarımfinala yüksəlməklə, medallardan birini təmin edən idmançılar 20 ölkənin təmsilçiləridir.

Bu "20-lik"də Azərbaycan da yer alıb. Mundiala cəmi 4 idmançı ilə qatılan millimiz medal baxımından 50 faizlik nəticə göstərib. Yəni rinqə çıxan 4 nəfərdən ikisi - Kamran Şahsuvarlı (75 kq) və Məhəmmədrəsul Məcidov (+91 kq) dünya çempionatının mükafatını təmin edib. Komandamızın üzvlərindən Lorenzo Sotomayor (64 kq) və Pərviz Bağırov (69 kq) isə medal arzusu ilə erkən vidalaşıb.

Dünya çempionatında oynanılan 40 medaldan 2-sini - 5 faizini əldə edən Azərbaycan millisi mundialda 1-dən artıq mükafata yiyələnən 6 ölkədən biridi. Ən güclü "altılığ"a Kuba başçılıq edir. Ada ölkəsinin 7 boksçusu 1/4 final səddini keçib. Asiyalılar - Qazaxıstanla Özbəkistan hər biri 10 çəki dərəcəsindən 6-da fəxri kürsüyə qalxacaq. 4-cü pillədə qərarlaşan ABŞ millisi cəmi 3 yarımfinalçısı ilə öyünə bilər. Yığmamız isə Rusiya ilə birgə 5-ci yeri bölüşür.

Digər 14 ölkə, o cümlədən 10 idmançı ilə təmsil olunan ev sahibi Almaniya yalnız 1 medalla kifayətlənməli olacaq. Qonşu Türkiyə isə Hamburqda uğura həsrət qalıb.

N	Ölkə	İdmançı sayı
1	Kuba	7
2-3	Qazaxıstan	6
	Özbəkistan	6
4	ABŞ	3
5-6	Azərbaycan	2
	Rusiya	2
7	Almaniya	1
8	Avstraliya	1
9	Kolumbiya	1
10	Cənubi Koreya	1
11	İngiltərə	1
12	Hindistan	1
13	Gürcüstan	1
14	Monqolustan	1
15	Fransa	1
16	Ukrayna	1
17	Ekvador	1
18	İrlandiya	1
19	Kamerun	1
20	Ermənistan	1
Cəmi	20	40